一丁唔一丁又點

上網睇今個禮拜日去邊度食飯,順手望望以前做暑期工果間茶餐廳。
見到所謂食評,有好多篇都讚話公仔面好味呀,食得出係用出前一丁。
有篇仲搞笑,「配菜一般,但係見佢係用一丁,算啦。」

哈哈哈。你地真係食得出係出前一丁?
你真係食得出?
定係睇周圍既牌,見到「只用出前一丁」呀?

無錯,以前,佢地剩係用一丁,唔使加錢。
但兩年前因為有次出前一丁送唔切黎,好急咁用左另一隻牌子既面。
後尾一丁愈加愈離譜,而且D人客試完話新面都幾好食,同一丁唔係差好遠,
所以佢地就賣兩隻面,平時就用平D果隻,指明要一丁就加一蚊。

我仲記得果陣老闆同老闆娘為左換唔換牌起度嘈。
因為係做街坊生意,所以最後老闆娘都費事換牌,剩係同D熟客講話而家轉左喇,一丁要加錢。

你班友,平時都唔係食開既,特登出中環食一次茶記跟住起度扮野。

我唔知間餐廳而家係咪又轉番剩係用一丁,但有幾篇食評,日子正正係換面果段時間。
而寫既人都係特登覓食既。
間野冇其他俾你讚喇咩?西多,奶油多,紅豆冰,係我目前食過最正既!(係特製既,當然)
定係你覺得話好味好香好滑太過空泛,唔能夠表現出你好識食?

你同時俾福面同一丁我,我食得出邊隻係一丁。
你同時俾四洲同一丁我,我食得出邊隻係一丁。
但你就咁俾一碗面我,我未必肯定佢就係一丁。
其實我一樣都係唔識食。
所以要提醒自己,唔好好似佢地咁,懶係識食。
你地要提我。